الغنيمة | ٣٧

كتابةمعازف - فبراير/شباط 12, 2018

قام باختيار أغاني هذه الحلقة من الغنيمة عمار منلا حسن ومعن أبو طالب.


بتستمر إصدارات شب جديد اللي عم ينزل أغاني تراب من إنتاج الناظر بتقدر ترقص عليها وتنتحب بنفس الوقت. في الأغنية الجديدة، بنساك، واللي محطوطة عالريبيت عنا من أول ما نزلت، بنسمع تآلف صوتي وتماسك لدرجة بصير معها صعب تقدر تتخيَّل كيف كان كل مقطع لوحده. بارات شب وجديد ومقاطعة اللي صارلنا فترة مش سامعينه – بتعطي ثقل معين نادر ما تسمعه في التراب، بتخليك مبسوط بالبيت بس برضه حاسس اني في شيء جاد عم بصير بالكلمات، شيء جاد وجميل ومُظلم. بنساك إنجاز للشباب من رام الله.

يستعد كوال، عضو فرقة لِبانون هانوڨر، لإطلاق ألبومه الطويل الثاني ذ آلتيمايت كلايماكس، واللي حصلنا منه مؤخرًا على أغنية هاو مِني جرايڨز اللي بتلعب كلماتيًا على أغنية بلوين إن ذ ويند لبوب ديلان. بتخلط الأغنية مزيج فج من الهاوس والموسيقى الصناعية والجماليات القوطية، يضاف عليها صوت كوال المسخي بشكل مبتذل متعمد، لنحصل بالنتيجة على صوت خشن وملتوي على أكثر من مستوى.

إعلان

في أغنيته الجديدة عيد ميلادي باظ، بيتحوَّل فرعون من التبجح والأسطر اللاذعة للسرد ورصد سلسلة أفكاره، دون ما ينزل مستواه أو يتخلى عن أسلوبه الخاص بالكتابة. الحس السوداوي اللي كان يتجلى كعدائية في التبجح، صار سخرية سوداء في السرد: “صاحبي جابلي هدية بوكس / ٥ جرام استروكس (…) بيقولي لف جوب تاني / كلما تكون غايب أحسن.” إلقاؤه وصوته اللي بيبرزوا صغر عمره بيخلوا وقع كلماته ذو أثر مضاعف حارق، حنجرته كأنها فلتر كرتون في آخر جوينت.

منعرف الكثير عن أغنية لوك ألايڨ، واللي بتضم بلوكبوي جاي بي ودرايك، من مجرد اسمها. في الأغنية حيوية بتسمحلها باستخدام تقاليد قديمة في الراب وفي الفيديو دون أن تتخلى عن عصريتها، ببساطة قدرة على سحب الماضي للحاضر، وفي بعض اللحظات للمستقبل.

عادةً لما نسمع أغنية راب نص عربي نص إنكليزي بتضرب على عصبنا، بس أغنية آر رايم الجديدة بتسحل اللغتين بتدفق مفعم بالشخصية بيلغي المشكلة من أساسها. بيلقي آر رايم ببارات الراب من طرف لسانه، كأنه بيأكِّد على السهولة المفرطة اللي بيكتب وبيلقي فيها رابه. بيدعم تدفقه البايس الطاغي على الأغنية بشكل فج ومهيمن، بيهمِّش كثير تفاصيل هي موجودة فقط حتى يهمشها البايس.

حصلنا الأسبوع الماضي أخيرًا على ألبوم الموسيقى التصويرية الخاص بفيلم بلاك بانثر، واللي أنتجه واختار الموسيقيين فيه كندريك لامار. إلى جانب العينات الممتازة اللي سمعناها على مدى الشهر الماضي، اكتشفنا في الألبوم أغاني محمِّسة كـ آي آم لجورجا سميث، واحدة من أفضل المغنيات اللي ظهرت العام الماضي، وبلُدي واترز اللي ضمت تعاون سلس بين آب سول وآندرسن پاك وجايمس بلايك.

نزَّل تو تشاينز تسجيل قصير مفاجئ من حيث انه لم يعلن عنه من قبل، ومن حيث كونه مباشر وخام بدون أي تعقيدات أو خدع بالراب أو الإنتاج، حتى بدون تعاونات غير ظهورين مقننين لـ واي جي وأوفسِت في أغنية پراود.

إعلان

في أغنية دوري، بتقطع مجموعة الشارع فاميلي مسافة جديدة في البحث عن صيغة هجينة بين الغناء الشعبي المصري وبين اللازمة الغنائية في التراب. اللازمة اللي بيخرجوا فيها مسليَّة ومتسقة مع تدفق الأغنية لدرجة بتغطي على بعض الفجوات في الإنتاج، والمفهومة باعتبار الأغنية أغنيتهم الأولى.

أعلنت تسجيلات هاندستتِشد عن استعدادها لإصدار التسجيل القصير المقبل للموسيقي المصري المقيم في إيطاليا، پاي آر سكوِرد. OCL8 هي ثاني عينة من التسجيل، مقطوعة بتنجح برصد مزاج أمكنة معينة دون اللجوء للأساليب المعتادة للموسيقى المحيطة، ومع تركيز أكبر على نسيج الصوت وتفاصيله والخامات المنحوت منها.

Leave a Reply