أُجريت هذه المقابلة في مقر تسجيلات رعد في المعادي، القاهرة.
بدأ أماكا جاجي مشروعه الموسيقي مطلعَ هذا العقد، أثناء إقامته في تونس وعمله صحفيًا في برنامج دولي تابع لهيئة الإذاعة البريطانية (بي بي سي). أصدر أعماله في بدايته على استحياء حتى إطلاق ألبومه الأول تيديت، عام ٢٠٢٤؛ ورغم أن الألبوم لم يحظَ بالنجاح الجماهيري الذي يستحقه، بشّر بمشروعٍ موسيقي واعد من منطقة قلّما نطّلع على أخبارها وفنونها، وتحديدًا مدينة غات في جنوب ليبيا، الواقعة على أطراف الصحراء الكبرى.
في وقتٍ اختُزلت فيه موسيقى الصحراء إلى حد كبير في تجارب بعض الفرق أهمها فرقة تيناروين، قدّم تيديت جذور تلك الموسيقى من إيقاعات وألحان ضمن قوالب حديثة، ومزجها بأنماط متنوعة مثل الهيب هوب والموسيقى الإلكترونية والصوفية والعربية، في محاولة جادة لطرح تصور مختلف لموسيقى الطوارق.
أُجريت هذه المقابلة خلال العمل على ألبوم أماكا الثاني، حب وحرب، المرتقب صدور جزئه الأول في شهر ديسمبر. تحدثنا معه عن نشأته وجذوره الصحراوية ومرجعيته الصوفية، وعن بدايات علاقته بالموسيقى وعمله صحفيًا في تونس نحو عقد من الزمن، وصولًا إلى انتقاله إلى مصر لبدء مرحلة جديدة أكثر جدية في مسيرته الموسيقية.
الأجواء في رعد عاملة ايه؟
والله حاسس إني في بيتي، عندي سنة ونص معاهم احتووني يعني. ميزة رعد إنه الناس كلهم هنا فنانين، حتى المحاسب المالي فنان، حاجة غريبة يعني. الناس يتعاملوا معاك كإنسان قبل ما تكون بتعمل حاجة. هادي الحاجة اللي لمستها واللي خلتني منطلعش، يعني تحس إنه بشر بيشتغلوا معاك. مفيش نظرة إنه “إزاي هستفاد منه”، لكن تعامل إنساني مائة في المائة.
ازاي حصل التواصل بينك وبين رعد؟
أنا جيت مصر هنا بعد ما كنت في تونس. خسرت خدمتي هناك وجيت على هنا. جيت مصر وصلت على المطار وأنا منعرفش ولا واحد. صدفة في أول يوم اتعرفت على حد، حد للتو مهم جدًا في حياتي، ووصلني لعاصم تاج. كان دا في أول أسبوع، في الأسبوع دا جيت رعد وقالولي احنا أصلًا بنعرفوك من كويفيا وكدا. وبعدها سمعتهم أول أغنية من الأغاني اللي عندي أن ريليسد، من أول ثلاثين ثانية عاصم قالي: اسمع خلاص إنت معانا. تحمس جدًا رغم إن عاصم معروف عنه دايمًا إنه مشغول وكدا، بس كله استغرب ازاي عاصم قعد يسمع ياجي عشرين أغنية من اللي معاي وممسكش تليفونه ومركز مع الأغاني. قالي إنه حاسس إن دي الحاجة اللي كان بيدور عليها.
خلينا نرجع بالحديث شوية ناحية النشأة، الحياة كانت عاملة ازاي في غات؟
أنا مولود في غات في بيئة بسيطة جدًا وحي بسيط جدًا، مدينة تعداد السكاني فيها لا يتجاوز الخمسة وثلاثين ألف نسمة. محاطة بالرمال والجبال.
غات رسميًا ضمن ليبيا صحيح؟
ضمن ليبيا، تحديدًا في الحدود الليبية الجزائرية. نحنا آخر منطقة في ليبيا، عندنا حدود مع دولة الجزائر ودولة النيجر. ونحنا ناس بسطاء جدًا وناس عايشين على حاجتين: الجو الروحاني اللي هو إسلاميات وصوفية وكذا، واني جيت من عائلة صوفية ووالدي شيخ طريقة صوفي، وعايشين على الفنون والثقافة. الموسيقى عندنا مش ترفيه، هي حاجة روحية، وعندنا قبائل وكل قبيلة مختصين بنوع فن معين، وإنت لما تطلع من عائلة معينة لازم تستعمل نفس الفن هذا.
فأنا طلعت من البيئة دي بس بحياتي معمريش فكرت أني نعمل مزيكا. زمان لما كنا صغار كنا نروح على الرملة نعمل جمباز ونلعب، فكان في مكان ننزل فيه وصعب منه الطلوع فنقعد نرتاح. كنت لما نقعد نرتاح يقولولي غنيلنا، فأغني حاجات كده عشوائي للشاب حسني ومعرفش ايه. هما كانوا بينبسطوا منها وانا كنت بغني بتسلى مش إني فنان. عمري ما توقعت نفسي هكون فنان نهائي.
ايه أنواع الفنون اللي كانت موجودة في غات؟
هي فنون مرتبطة بالثقافة الصحراوية (الطوارق)، نحنا مجتمع صحراوي، معظم الناس عندنا يا إما طوارق يا إما متأثرين بالثقافة الطوارقية. بس مدينتنا برضو مختلطة فيها طوارق وفيها عرب وفي هوسا.
ايه اللسان المنتشر واللغة الرئيسية؟
نتكلموا بلسان عربي ولسان طارقي وفي ناس بتتكلم هوسا، بس كلنا نشترك في اللغة العربية. بس العربية بتاعنا مختلطة بالطارقي وبالهوسا، بس تقدر تقول هي اللغة الدارجة اللي يتحدث بها معظم الناس.
طب أنا عندي فضول أعرف معنى اسمك وأصله؟
اسمي طارقي، هو بيقولوا هنا أماكا بس هو بيتنطق إماكّا، وبالنسبة لمعناه، أنا كانت أمي الله يرحمها قالت لي اسمك على اسم بير مياة في الصحراء، بس لما كبرت ملقيتش بير مياة في الصحراء. وأنا عمري ٢٧ في تونس، درت بحث اكتشفت ان اسم أماكا منتشر في نيجيريا بس بيسموه لبناتهم، لكن احنا في غات بيسموا إماكّا تيمنًا بمكة المكرمة. البنت بيسموها ماكت والولد بيسموه إماكّا.
أنا قرأت ان جدتك كانت موسيقية وبتغني وليها تسجيلات، فهل كانت الموسيقى موجودة في العائلة من الصغر؟
أنا جدتي كانت تلعب على آلة اسمها إمزاد، وأنا كبرت في عائلة كلها أهازيج. يعني بويا كان شيخ طريقة صوفي وخوتي في المجال الصوفي، وأنا طفولتي كلها كنت بدرس قرآن. فديما في الأهازيج والبنادير والفنون الطارقية وجدتي تلعب إمزاد، لكن كل هذا مكانش موجود كفن، عمري ما كنت أحسب جدتي إنها فنانة، معندناش حاجة اسمها فنان. عندنا الفنان هو اللي يلعب جيتار، واللي يلعب جيتار كان حاجة ليس لها قيمة في المجتمع، نحنا عندنا الجيتار بيجلب الفقر، لأنه معظم اللي يلعبوا جيتار فقراء. فالفن كان مربوط بالفقر، لكن الحاجات التانية مكانتش تعتبر فن، هي ثقافة.

فهي فنون ثقافية مرتبطة بالقبيلة مش أشياء استهلاكية؟
بالظبط مش حاجة استهلاكية نهائي، هي أقرب إلى حاجة روحية وجزء من الهوية. يعني الإمزاد مثلًا هي موسيقى بيحكوا فيها عن المعاناة وبيحكوا عن الحروب وعن الأشياء اللي بتمر. مثلًا في موسيقى اسمها اسقوقاين، دي مبنية على مدح النبي وتذكر الموت وهكذا.
والوضع في غات سياسيًا واجتماعيًا عامل ازاي؟
احنا مجتمع متجانس. نعيشوا مع بعضنا إلى حد ما لكن برضو مختلفين. يعني إذا إنت تجي من برا تحس إنه احنا نعيش كمجتمع واحد، لكن لو نظرت عن قرب احنا مختلفين، يعني في بيناتنا الأجواء القبلية.
طيب إنت سافرت من غات على تونس، ومن ثم من تونس على القاهرة، ايه الفروق الثقافية والاجتماعية اللي شفتها، وايه اللي أثر فيك شخصيًا وفي تجربة أماكا؟
أنا أكتر مكان أثر فيا وخلاني أنا هو تونس. أنا في ليبيا كنت إنسان عادي، كنت زيي زي أي شاب تاني. الطموحات عنا كانت معلقة ومحدودة. يعني في ليبيا لو بصينا للفن، إنت معندكش حاجة ملموسة تنظر ليها، مفيش حد عمل حاجة قدامك عشان إنت تعملها، بس نحنا كصحراوين عندنا فرقة تيناروين اللي هي عملت وغنت واخدت جرامي، فانا كصحراوي ببص واشوف تيناروين فبيعطيني أمل. لكن نحنا كشباب نعيش في البلاد معندكش مثل تبصله. احنا في غات كنعيشوا جماعات مش كأفراد، ديما معايا صحاب وديما معايا ناس، حوشنا كان ديما عامر بالناس لأن أبويا كان شيخ قبيلة وشيخ طريقة وبيعالج الناس فديما بيتنا مليان، بس إنت معندكش فرصة تقعد مع نفسك تفهم إنت مين. فبتصير إنت مع اللي صاير بس. فصارت هذه الصدفة إني رحت تونس، ولما رحت تونس حتى موضوع المزيكا مكانش في بالي.

كان ايه سبب سفرك لتونس؟
انا كنت رايح تونس أشتغل صحفي. أنا حياتي كلها كنت أشتغل صحفي، لما كنت في غات بعد الثورة اشتغلت في مجلة اسمها رابسا، كنت من الممثلين بتوع المجلة وقعدنا نطالب بحقوق المواطنين وكذا. وبعدين اشتغلت مصور فوتوغرافيا.
كنت بتشتغل في أي نوع من الصحافة؟
كانت صحافة تقدر تقول عليها خدمية، نتكلم في قضايا ومشاكل الناس ونحكي عن المسؤولين وكذا، وفي جانب سياسي برضه. وقتها أنا كنت مبصورش، والشب اللي كان معانا كان بيصور بالتليفون، فيعني كانت إمكانياتنا بسيطة جدًأ. في يوم كنا في حدث في مدرسة ورايحين نغطي، وكانت المدرسة فيها مصورين معاهم كاميرا بروفيشنال وكذا، كان الشخص اللي المفروض يصور مجاش، فجالي رئيس المجلة قالي اسمع إنت لازم تصور النهاردا. اخدت التليفون وصورت وخلصنا رحنا على المكتب وشافوا الصور، رئيس المجلة قالي وقتها إنت تعرف تصور أحسن ما تعرف تكتب كصحفي، فأنت من النهاردا هتبقى المصور، وبس اشتغلت في التصوير.
كل ده ما قبل تونس؟
آه هحكيلك السبب اللي خلاني اروح تونس اصلًا وازاي وشنو الفرق اللي بعدين اتضحلي. أنا أبويا اتوفى في ٢٠١٤ بسبب إن كليته وقفت، وكان مفيش دكتور وبتفرج على أبويا بيموت قدامي ومفيش دكتور وجاري مات بوه من نفس السبب وحدث الموضوع هذا مع أكثر من شخص، ومافيش أي حد عمل أي حاجة.
أبويا مكانش عاجبه إني بصور لأنه أنا مكنتش بدخل فلوس، كان يقولي إنت بتضيع وقتك على شغل المجتمع المدني وتخدم ببلاش وتجي هنا تقولي أعطني مصروف فهذي حاجة مش راكبة. أنا كنت مؤمن بالحاجة دي، بس لما مات ابويا رحمة الله عليه حسيت خلاص طالما أبويا مش عاجبته الحاجة دي معملهاش. هو مات ٢٠١٤ فأنا قعدت مبصورش لحد ٢٠١٦ وكان عندي كاميرا بعتها.
بعدها بفترة اخدت كاميرا من صاحبي وصورت وبعدين رحنا طرابلس عملنا معرض صور، ومن المعرض دا قدرنا احنا نقدموا دعم لقسم الكلى وقدرنا نوصلوا قضايا بتاع الناس. كان أول مرة ندير حاجة نحس إنها ممكن نحدث فرق. مش بس انا من منطقة نائية وضعيف، لا، أنا نقدر نحدث فرق. أنا وقتها حسيت إني درت معرض في العاصمة الليبية بدعم من شركة ليبيانا اللي هي اكبر شركة في ليبيا وبعت رسائل على الليبيين كلهم فحسيت إني أنا نحدث فرق. بعد المعرض قدمت على تدريب في بي بي سي لمدة ثلاثة شهور ورحت تونس فصارت صدفة واشتغلت خلاص.
لما رحت هناك تونس اشتغلت مع مجتمع ليبي مختلف عن أهلنا الليبيين اللي أنا نعرفهم، أشخاص كلهم ساكنين بروحهم، كلهم عندهم عقليات مختلفة عن بعض، مابيفكروش نفس بعض، لبسهم مختلف وكلامهم مختلف، ومتقّبلين إنك أنت مختلف. هما حبوا إني جاي من غات فهذه حاجة خلتني نبحث في نفسي.
الموسيقى مكانتش لسة دخلت حياتك؟
آه، وأنا في الخدمة في بي بي سي وقتها لقيت جيتار، قلت أنا جاي من مدينة فيها جيتار وكنت أتعلم زمان وبطلت، ورجعت عزفت جيتار. في تونس اتعرفت على ناس وشفت حاجات هي اللي كونت شخصيتي، والموسيقى ابتدت في تونس وحتى أول شغل حقيقي أتقاضى عليه فلوس كان في تونس مع بي بي سي. فتونس بالنسبة ليا هي وطن، عشت فيها تسع سنين، أنا بقالي سنة ونص برا تونس لسه كلامي في كلمات تونسية، لسه بفكر كتونسي أكثر من اي شخص تاني. أنا رحت تونس وأنا ٢٤ سنة وخرجت منها ٣٢ سنة، فشبابي كله في تونس.
بس في تونس برضه على قد ما هي منفتحة إنت تحس بوحدة، لأن الناس مش اجتماعيين كتير. أنا هناك تعرفت على عائلة تونسية تقدر تقول تبنوني، وقفوا معايا وسكنت معاهم سنين ووقفوا معايا في أحلك الظروف. بس كمجتمع كامل تحس روحك غريب كل يوم، وأنا كنت أحس حالي غريب. خاصة لما صار الموضوع بتاع أفريقيا وجنوب الصحراء دا، وكان في مشكلة مع الناس اللي جايين من جنوب الصحراء كنت بتعرض لعنصرية مبدأية، بس لما كانوا يعرفوا إني ليبي يعاملوني كويس. بس وقتها اتعرضت لعوامل خلتني اتقوقعت معتش أطلع واجد وبعدين جيت هنا.
في مصر بجد حاسس نفسي صغرت في العمر، والبلد خلتني مضغوط بشكل أقل والناس عاملوني كويس واحتضنوني. أنا في مصر صارت معايا أسوأ حاجة ممكنة، أنا حياتي كلها أنا بهاجر وبشتغل وأدخل فلوس عشان أكون قادر إني نعول أمي لما تحتاجني، وساعات كانت تجيلي تونس وأنا نتكفل بالعلاج وهكذا ودا كان شئ بفخر فيه. فأنا في وسط المعمعة هنا في مصر، أمي توفت، أمي وأختي توفوا في حادث سيارة. هذا كان أصعب يوم يمر علي كإنسان، وخففوه عليا المصريين. وقفوا معايا والمكتب كله في رعد جالي البيت وقعدوا معايا من الصبح لليل وحجزولي طيارة وصرفولي فلوس وعطوني دعم نفسي ووصلوني المطار وساعدوني كتير. يعني مصر بجديات أعطتني روح تانية.
لقيت أهل صح. وأنا في تونس كان عندي أهل برضه احتضنوني ست سنين، بيت خالتي نجاة وعمي فرج، والله آخر مكالمة بيني وبين أمي قالتلي “سألت على خالتك نجاة؟” تقولي هي أمك التانية، والعائلة دي في تونس كانوا سبب صمودي، يعني بمثابة العائلة الثانية.
امتى وازاي دخلت الموسيقى حياتك بشكل احترافي وقررت أنك عايز تكمل في الطريق دا؟
في ٢٠١٨ لقيت واحد معايا في المكتب وبدأنا نعمل موسيقى مع بعض بس بهدف التسلية، وأتت كورونا، ومكنش في شغل في المكتب، فعملنا أغنية ونزلناها. الأغنية دي بعد ما نزلت لقيت ناس بتسمعها وناس من أوروبا يبعتولي فيديوهات بيسمعوها. اللحظة بالضبط اللي قررت إني هعمل موسيقى بشكل احترافي كانت في ٢٠٢١. أنا كإنسان أحيانًا نعاني من نوبات هلع، من وانا طفل، وكان الدكتور يفحصني يلاقيني تمام بس أنا بحس إن قلبي مش تمام. كانت نوبات الهلع دي دائمًا تنتصر عليّ، ونحس روحي خلاص بنموت ونيأس في الحياة.
في ٢٠٢١ كلمني صاحبي وقالي في أغنية عايزين نشتغلها وتاخد عليها فلوس، وكانت فلوس الخدمة يادوب بتقضي أكلي. عملنا الأغنية وبعدها جالي صاحبي قالي احنا محتاجين نروح ليبيا نأديها ونزيدك فلوس. كان عمري ما غنيت قدام الناس، ورحنا ليبيا. لما وصلت قلت لنفسي هتطلع تغني أغنيتين وخلاص، وكان المكان فيه خمسين نفر فقط، وكلهم سياسيين ودبلوماسيين وكذا، كان المكان تبع السفارة الهولندية.
طلعت نغني، أول ما وقفت قدام الناس بنغني، جاتني أسوأ نوبة هلع في حياتي، وخفت والناس كان تصور فيا ورجلي ترعش وصوتي مش طالع. هي كانت لمدة دقيقة بس حسيت إنها بتحدد مصيري، فأنا في قمة الهلع، قلت إنت توا الناس دافعينلك فلوس عشان تيجي تغني وجايبينلك سيارة وقاعد توا ترعش؟ وجه قدامي خيارين يا إما تكمل تغني يا إما تسيب الجيتار دلوقتي وتطلع، إنت عايز ايه؟ وجسمي بيرعش. حاجة قالتلي إنت عايز تغني. كملت غنيت. ولما غنيت الأغنية الأولى حسيت إني انتصرت على شعور الهلع، وبعدين غنيت الأغنية الثانية، وبعدين رجعت قلتلهم ممكن نرجع نغني تاني؟ حسيت لأول مرة في حياتي إني انتصرت على نوبات الهلع.
رجعت على تونس وكنت ساكن مع صاحبي في البيت وسألني قالي حصل إيه؟ قلتله أنا عملت أسوأ حفلة في حياتي، بس أنا من النهاردا هكون فنان. عرفت إني المفروض أكون فنان، لأن الحاجة دي خلتني أعمل حاجة مكنتش قادر أعملها طوال حياتي وهي إني انتصر على هذا الشعور، ومن اليوم هداكا إلى النهاردا ونوبات الهلع معادتش تأثر فيني، ونادرًا ما تجيلي.
كانت إيه أولى خطوات إنك تعمل موسيقى بشكل احترافي، وإمتى جه أول ألبوم؟
اسمع أنا عندي تقريبًا توا يمكن سبع ألبومات، عندي ألبوم صوفي وألبوم جاز، لو تقعد معايا أسمعك مزيكتي هتحتاج على الأقل خمس ساعات تسمع كل حاجة، يعني أكثر من مائة أغنية. اللي نزل من الموسيقى اللي انا عاملها كان اتنين في المية. فأنا من اللحظة دي في ٢٠٢١ وأنا بعمل مزيكا بدون توقف.
نزلت ألبومك الأول تيديت في ٢٠٢٤، كنت بتطمح لإيه بإصدار الألبوم دا والشغل عليه، وكنت حابب تقدم ايه من خلاله؟
أنا لما نزلت تيديت كنت فاكر إن حياتي هتتبدل، لأنه كصوت وكألبوم مبيشبهش حاجة. فأنا لما قعدت وفكرت في المزيكا، قلت أنا مش عايز أعمل مزيكا عادية، أنا عايز أضيف حاجة للعالم. أنا عقلي مكانش يفكر كموسيقي، يعني أنا لما اشتغلت في بي بي سي واحتكيت بالناس وشفت، عرفت إن عندي حاجة قوية مش بس تميزني عن الناس بس تميزني عن العالم، وأنا مش ضعيف قدام العالم.
كنت بسمع كانييه ويست وبسمع فنانين كبار وبحس دول مش أحسن مني، هما عندهم حاجة وأنا عندي حاجة، بس هما الفرصة عندهم أحسن. ولكن أنا بإمكاني أصنع الفرصة هادي. فألبوم تيديت ده كان المشروع اللي حطيت فيه هويتي ومين أنا. الشخص اللي من عائلة صوفية وعندي جذور صحراوية وكبرت وأنا بسمع هيب هوب، والراي جزء من ثقافتنا بحكم قربنا من دولة الجزائر، وكنت برقص هيب هوب فمتأثر بفيفتي سينت ودكتور دري والناس دي. فقلت كصوت لازم الألبوم يظهر الحاجات دي.
بتصنف تيديت كموسيقى طوارق؟
أنا كان عندي مشكلة مع الموسيقي الصحراوية، يعني تيناروين مثلًا هما يعاودوا في نفس الموسيقى بقالهم سنين وميطوروهاش، فبحس إن موسيقى الصحراء دي لازم حد يشيلها ويطورها. بحس إن الموسيقى بتاعتنا الموسيقى الصحراوية أو الطوارق هي موسيقى معزولة، يعني اللي بيلعبوا القرقب، هما فرقة لكن مستحيل يلعبوا مع ناس تانيين، وأنا مستحيل نلعب قرقب لأن في قبيلة تلعب قرقب، ومقدرش ألعب مزمار لأن في قبيلة تلعب مزمار. احنا مجتمعنا على مستوى عميق هو مجتمع منفصل ومنقسم.
في تيديت أنا حاولت أوحّد الأنواع الموسيقية دي وأجمعها، أخذت القرقب وأخذت المزمار والإمزاد والإيقاعات الطوارقية وخليتهم حاجة واحدة، وحاجة جديدة على المجتمع بتاعي. المجتمع بتاعي كان عمره ما سمع موسيقى بهذا الشكل. يعني كان الصوت ديجيتال لكن بإيقاعات مألوفة عليهم، كانت فكرتي إني ناخد إيقاعاتنا، والروح الصوفية، والألحان الطوارقية، وأصيغها في قالب ديجيتال حديث. تيديت كان صوت إلكتروني حديث بس مش إلكتروني غربي، طوّعت الصوت ده في قالب جديد.
منجحش الألبوم، أنا كنت فاكر لما عملت تيديت إنه هيحطني في حتة بعيدة. يعني أنا بحترم الناس اللي بتشتغل دلوقتي، بس بالنسبة ليا ألبوم تيديت مقارنة بالشغل اللي نازل دلوقتي، مفيش مشروع أقوى من تيديت، ومش بس عشان أنا اللي عملتها بس بصدق كان فيه روحي وروح بلال وروح راتشوبر وروح بلادي، كان تراث كبير لناس عمرها آلاف السنين.
ليه في تصورك منجحش تيديت؟
النجاح ده حاجة بتاعة ربنا بس لو بنحكي بالمنطق البشري مش الإلهي، لو هحلل ليه منجحش، أعتقد ألبوم تيديت متقدم سنين على أذن المستمع العربي. المستمع العربي العادي، مع احترامي، نطاقه السمعي وتقبله للموسيقى محدود، بيحب يسمع الحاجات المألوفة ليه. للأسف المجتمع العربي أفقه الموسيقي محدود. مع الأسف فكرة الديجيتال وفكرة إن الموسيقى ولّت حاجة سهلة، خلت الموسيقى تفقد القيمة بتاعتها مقارنة بفنون تانية زي اللوحات والرسم مثلًا. إنت كفنان هنا ميبقاش عندك قيمة لو معندكش أرقام. أنا في مرة قعدت مع حد مغربي عشان نشتغل وكان متحمس وبيقولي أنا نعرف تيناروين ونحب الموسيقى هاد وبعدين قالي وريني سبوتيفاي بتاعك، لقى عندي ٢٥٠ مستمع، معاملته اتبدلت في لحظة.
يعني الناس بتحكم من منطلق الأرقام فقط قصدك؟
نعم الناس بتحكم من منطلق الأرقام وهاد الحاجة اللي خلت الناس معادش عندها الجرأة إنها تعمل حاجة جديدة. وهذي الحاجة خوفتني أنا شخصيًا، خلتني أفكر إزاي نوصل فكرتي بطريقة بسيطة، ودي الحاجة اللي عملتها في ألبومي الجديد حب وحرب. ازاي أخلي الفكرة بتاعت تيديت اللي هي عميقة نسبيًا توصل للجمهور.
في النهاية إنت كفنان عندك رسالة. مثلًا توا أنا نتكلم معاك، أنا مضطر أتكلم معاك كلمات مصري عشان تفهمني. بس لو اتكلمت معاك ليبي وأنت مفهمتنيش احنا استفدنا ايه؟ فهي كدا المزيكا، تواصل. أنا عايز الناس يسمعوني ويسمعوا قصتي ويسمعوا أنا بحكي على إيه، وأوصل إحساس أكتر من إني أقول كلام. طالما الموسيقى اللي عملتها في الأول موصلتش للناس معناها إني محتاج أعيد النظر في اللي أنا بعمله.
مش شايف إن ده هيخليك مضطر تقدم تنازلات فنية؟
مش تقدم تنازلات بقدر ما تحسن أدوات التواصل بتاعتك. ممكن يجيك بروفيسور متمكن وعنده شهادات بس ميقدرش يوصلك المعلومة، مع إنه عنده المعلومة، ويجيك بروفيسور أقل منه علمًا يوصلك المعلومة، شو الفرق بينهم؟ الفرق هو شو استعمل من أدوات عشان يوصلك. هو دا اللي بشتغل عليه.
أنا ألبوم تيديت كان درس مهم بالنسبة لي. خلاني نفهم إن دي حاجة مهمة أنا عملتها بس لسه الناس هتفهمها مع الوقت. لما الناس تفهم السهل اللي هعمله جديد، هيتطلعوا يشوفوا الأعمق، فهيسمع الحاجة الأعمق ويحس بالرابط بينهم. أنا بعد تيديت نزلت كام حاجة غلطت فيهم وكانت مشتتة، كنت بدور على الحاجة اللي عايز أعملها، وفي ناس لاموا عليا إنه إنت ازاي تعمل حاجات تجارية؟ أنا في الآخر إنسان، وأنا بعاني ماديًا فأنا نبي نوصل ننجح.
محاولات اللي اخترع الضو هذا اديسون دار ألف محاولة فاشلة بس وصل لمحاولة ناجحة. أنا من حقي ندير محاولات فاشلة ومن حقي نجرب. وأنا برضه مروحتش عملت بوب في المطلق، وحتى لو نعمل بوب، مش سهل تنجح. يعني حتى أغنية زي البسي أي حاجة وانزليلي مش سهل تعملها وتنجح مع الناس. أنا عمري ما أقلل من نجاحات الغير لكن نحاول أتعلم مهارات واطبقها على الحاجة اللي عندي.
حسيت إنه تيديت جزء من عدم وصوله للناس إن في حاجز لغوي أو ثقافي؟
لا خالص. أنا مؤمن إن الموسيقى مش لغة، الأساس في الموسيقى هو اللحن. دلوقتي في تريند الشاب اللي ماشي في ايده سبيكر والمصريين كلهم عاودوه، هل هما فاهمين شو بيقول؟ لا بس الإحساس وصلهم لأن اللحن علق في ودنهم. عمرها اللغة ما تكون حاجز لحاجة إنها تنجح. مثلًا أغنية محمد منير شمندورة، هي أغنية نوبي محدش من المصريين فاهمها بس تنجح. عمرها الكلمة ما تكون هي القيمة الأساسية، مع إنها مهمة، لكن الحاجة اللي بتنجح المشروع هو الألحان والإحساس اللي بتوصلها. تيناروين نجحوا وخدوا جرامي وهما يغنوا اللغة اللي أنا بغنيها.
أما أنا محتاج أشتغل على نفسي عشان أعمل حاجات توصل للناس أكتر، أبسّط الموسيقى. تيناروين مثلًأ موسيقتهم بسيطة. فكرة التعقيد أنا كنت بنظر لها كأنها قمة الفن، دلوقتي بفكر إزاي أكون أبسط وأوصل للناس. حتى الله سبحانه وتعالى لما نزّل القرآن، بسّطه وخلاه سهل، والنبي قرأه بقراءات متعددة عشان كل الشعوب المختلفة تفهم ويبقى أسهل عليها. السهولة دي صعب تعملها.
يعني الألبوم الجديد هيكون أبسط في محتواه، بس هل هيحمل نفس الرؤية من حيث الاستلهام من التراث؟
التراث الموسيقي موجود أكيد بس أنا عامله بطريقة جذابة أكثر. يعني الألبوم الجديد ده هيكون صعب إنك تتخطاه، أتحدى أي إنسان يسمعه وميعلقش معاه أغنية أو اتنين، صعب.
مين اللي شغال معاك على الألبوم من حيث التعاونات؟
اشتغلت أكيد مع بلال اللي هو شريكي في الرحلة. كموسيقى أنا مش شخص، أنا شخصين؛ أنا وبلال. اتعرفت على بلال في تونس صدفة، كنت بشتغل مع حد وسابني وراح في نص البروجكت، وجبت بلال عشان يشتغل معايا ٦ أيام على المشروع، بلال قعد في بيتي وقتها تسع شهور، هو يفهمني بدون ما أتكلم.
في تعاونات تانية في الألبوم؟
زولي بيشتغل على الإنتاج في أغاني كتير من الألبوم وبيشتغل على الميكسينج، وبرضو اشتغلت في أغنيتين في الألبوم مع شاب من الجنوب في ليبيا اسمه شيفو، واشتغلت مع واحد تونسي اسمه لاكراش. بس الألبوم دا التعاون الرئيسي فيه هو بلال وزولي.
اختيار زولي للألبوم مثير للاهتمام خاصة إنه بعيد عن الحتة دي موسيقيًا، إزاي حصل التعاون؟
زولي أسطورة. هما قالولي في رعد إن زولي خد البروجكت بتاعك عايز يشتغل عليه وإن دي حاجة عادةً مبتحصلش عشان زولي مبيحبش يشتغل على مزيكا حد، حتى لما يطلبوا منه بيرفض. يا مان أنا في فترة من الفترات بشتغل أنا وبلال وبنعمل أغاني ولما أجي أفنشهم وأعملهم هندسة صوت بحس النتيجة زبالة، فبيحصلي حالة إحباط.
قبل فترة كنا في الساحل أنا وعاصم فبحكي لعاصم إن المزيكا ممشيتش وبقوله أنا بعمل إيه في المزيكا وكدا، لا أنا هروح ليبيا واشتغل صحفي والمزيكا دي مش عايز اشتغل عليها بشكل رئيسي. دخلت مرحلة كدا ما بعد الشكوك، مكنتش حابب النتيجة النهائية للألبوم بتاعي. من بعد ألبوم تيديت مش عاجبني أي نتيجة، فحسيت إني أنا كنت متوهم، واللي في عقلي هذا مش حقيقي، فقررت وقلت لعاصم إني هسيب المزيكا وأروح ليبيا. عاصم قالي اصبر خلص الألبوم ده وروح ليبيا. بعدها عاصم قال إيه رأيك أعرفك على زولي، وقلتله أنا مش عايز أشتغل مع حد مشفتوش.
عاصم قالي إنت متعرفهوش بس زولي دا اسطورة ومفيش منتج أقوى منه. وأنا في قمة الإحباط قلتله ماشي وكلمت زولي. لما كلمته حبيته، واشتغلنا أول تراك مع زولي. في العادي زولي بيتأخر، لما بعتلي نسخة التراك وسمعتها، أنا قعدت ساعتين قاعد على الكنبة قربت إني أبكي، لأني حسيت لأول مرة من ساعة ألبوم تيديت لما اشتغلت مع راتشوبر إن في إنسان فهمني وعرف أنا عايز إيه، وفهمني مية في المية. عطاني نسخة من الأغنية ولعت فيا النار وخلتني إني أنا نستمر للمليون ونكافح تاني ومنقفش، بجد.
حسيت بفرق بين صناعة الموسيقى في تونس وصناعة الموسيقى في مصر؟
للأمانة أن لما جيت مصر هنا اتسوحت كتير، لأن أنا في تونس بعد تسع سنين عملت خريطة واضحة، كنت أشتغل مع بلال ونعمل الأغاني وبعدين التراكات تروح لراتشوبر وهو فهمني فبيخرجلي تراكاتي زي ما أنا عايزهم، وكان عندي مهدي وابراهيم في اللايف باند بتاعتي، فكان في سيستم. لما جيت مصر هنا كنت كل مرة بروح لحد، الموضوع أخد سنة كاملة تقريبًا عشان أوصل لزولي، ففي سنة كاملة اتسوحت فيها. بس بحس مصر بدلتلي مسيرتي يعني، أنا عاصم عززلي أيماني بنفسي ووقف معايا كتير هو ومالك تاج.
طيب أخيرًا، إنت قلت من شوية إن الفنان ليه رسالة، إيه هي رسالتك؟
أنا من كل اللي بعمله ده عايز حاجة واحدة توصل للناس: إنه مهما كنت، مهما كان لونك، مهما كان شكلك، مهما كنت في أي مكان في العالم، إنت لو عندك حاجة تبي توصلها واشتغلت وثابرت وتخلط الدموع مع الفرح ومتسمعش للناس اللي بيحبطوك، هتوصل.
والنقطة الأخرى إن في مجتمع كامل في غات أنا مدين ليه، أنا مستخدم عينات وتسجيلات من مئات السنين في مزيكتي فهذا تراث لا يمثلني أنا فقط. أنا نبغي ننجح كي نفتح مدرسة في غات ونفتح نادي رياضي ونفتح مركز خياطة إحياء لذكرى أمي، أنا جاي من مدينة مفيهاش دكتور كويس فنبغي ننجح وأنا حي عشان نساعد مجتمعي ونحس إني عملت أثر مش بس مريت في الحياة مرور الكرام.
في ناس شبحوني من وقت ما بديت نعزف على الجيتار، ما كنتش بعرف اعزف نوتات والناس شبحوني، هما هما الناس شافوني الآن منزل تراك مقاتل مع ويجز وبادي نكبر كفنان. أنا جيت من اللا شئ، أنا في تونس والله العظيم كان في ليالي معنديش أكل ناكل، ولسه في مصر أنا بحكي معاك ولسه بنكافح موصلتش، لسه وضعي زي وضع أي شاب بيعاني عشان يدفع الإيجار.
الرسالة في الآخر إني أنا إنسان، بغني عن الحب والحرب، بغني عن الجروح وعن اللي لازم تقاومه، وبغني عن المقاومة، مش بس مقاومة اسرائيل، بس مقاومة النفس، وبغني عن الغربة اللي بعيشها. أنا في الآخر إنسان ومريت بمراحل ومعاناة كثيرة، والحاجة اللي فخور بيها إني أنا استمريت برغم الظروف والطيحات ولسه بقاوم وما استسلمت.
